Ауыз судың зарын тартып отырған үш ауылдың тұрғындары  аудан орталығына қарай көшуі мүмкін. Олар Әйтеке би ауданының Бөгеткөл, Тасқожа ауылдары  мен Байғанин ауданының Қазақстан елді мекені. Ал Ырғыз ауданындағы Нұра мен Мамыр ауылы өз мекенін сақтап қалады. Қазір бұл ауылдарға ауыз су жеткізуге қажетті қаржы республикалық бюджеттен сұралып жатыр. Бұл туралы бүгін облыстық мәслихаттың тұрақты комиссиясы мен "Нұр Отан" партиясы депутаттық фракциясының кеңейтілген отырысында мәлім болды. Өңірде "Ақбұлақ" бағдарламасы аясында 100 жоба іске асқан. Бұл арқылы 28 елді мекенде тұратын 53 мыңнан астам адам ауыз суға қол жеткізді. Ал биыл "Өңірлерді дамыту" бағдарламасы бойынша 3,7 миллиард теңге бөлініп, 6 жоба қолға алынды. Облыстық мәслихат  депутаты Асқар Садықов ауыз су бағасын өсіріп, қордаланған мәселелерді шешуді ұсынып отыр. Ал облыстық мәслихат депутаты Марат Итеғұлов әйгілі "Көкжиде құмы" қойнауындағы жерасты суының қорын анықтау, пайдалану, өндіру жайын сұрады. Бірақ, облыстық энергетика және тұрғын үй-коммуналдық шаруашылығы басқармасы басшысының орынбасары Амантай Бекниязов облыстық мәслихаттың тұрақты комиссиясы мен "Нұр Отан" партиясы депутаттық фракциясының кеңейтілген отырысына дайындықсыз келген. Тіпті, болашағы жоқ елді мекендерді көшіру жұмысының жоспары нақты емес. Сонымен қатар орталықтандырылған су құбыры тартылған ауыл тұрғындарының қанша пайызы суды үйіне кіргізгенін де басшының орынбасары білмейді. Есесіне, 2016 жылы "Нұрлы жол" бағдарламасы бойынша 37 жоба ұсынылғанын айтты. Бұл жұмысты іске асыру үшін 11 миллиард теңге сұралды. Егер жоба мақұлданса тағы 20 мың адам сапалы ауыз суды тұтынып, ауылды сумен қамтамасыз ету көрсеткіші 72-ден 80 пайызға көтеріледі.