Облыстық тұтынушылардың  құқықтарын қорғау департаментінде кеңес беру орталығы ашылды. Мекеме мамандары қоғамдық бірлестіктермен бірлесе қызмет етеді. Енді тұтынушылар өз құқықтарын  мамандардың көмегімен ақысыз қорғай алады. Орталықтың ашылуына "Адал", "Мүдде Ақтөбе", "Тұтынушылар ұлттық лигасы" секілді тұтынушылар құқықтарын қорғайтын жергілікті қоғамдық бірлестіктер де атсалыспақ. Былтыр келіп түскен 82 өтініштің 70-тен астам пайызы сапасыз тауарды алмастырмау немесе кері  қабылдамау мәселесіне қатысты болса, 12-ден астам пайызы білім беру, шаштараз, байланыс қызметі мен жиһаздардың еншісінде, 11 пайызы тұрғын үй коммуналдық шаруашылық қызметінің өз міндеттемелерін дұрыс орындамауына, қалған 6 пайызы қоғамдық тамақтану орындарындағы салғырттық жөнінде. Құқығы тапталған тұтынушылар  наурыз айынан бастап Сәңкібай батыр даңғылы-1, 4-қабат, 416 бөлменің есігін қаға алады. Мамандар әр айдың бірінші сәрсенбісі мен үшінші жұмасында сағат таңғы тоғыздан кешкі алтыға дейін  қабылдайды. Құқығы бұзылған азамат  мамандардың көмегімен мемлекеттік мекемелерге сұраныс дайындауды, сатушыға немесе қызметті орындаушыға қатысты шағым, сотқа талап арыз жазуды үйренеді. Департамент өкілдерінің айтуынша, кез келген сатып алынған тауардың түбіртегі кепілдік мерзімі аяқталғанша сақталғаны дұрыс. Базарларда да сатып алынған тауардың түбіртегін талап еткен абзал. Бұл азаматтың құқығын қорғауға біршама жеңілдік береді.