Наурызда болжам бойынша  ауа температурасы орташа мөлшерден 1 градусқа жоғары болады деп күтілуде. Ал орташа мөлшер -1, -8 градус. Облыстың арнайы мамандандырылған қызметтері су тасқынына қарсы күрес шараларына кірісіп кетті. Бүгін облыстық әкімдікте төтенше жағдайлардың алдын алу мен жоюға қатысты жиналыс өтті. Су тасқынымен күреске 90 миллион теңге бөлінгені белгілі болды. Бүгінгі жиында облыс әкімі Архимед Мұхамбетов жекенің қолындағы су-тоғандарға абай болуды қатаң ескертті. Аудандық, ауылдық округ деңгейіндегі әкімдерге жеке өзен-көлдердің жағдайын тағы бір мәрте тексеруді тапсырды. Облыс аумағында 145 су шаруашылығы нысаны бар. Оның 8-і республикалық маңызда. 118 коммуналдық. 8-і жеке меншік. Облыстағы ең ірі Ақтөбе, Қарғалы, Сазды су қоймаларының жай-күйі бақылауда. Осы уақытта Ақтөбе су қоймасы 58 пайызға, Қарғалы 54, Сазды су қоймасы 37 пайызға толы. Ал қала қызыл сумен күреске 70 миллион теңге бөлді. Жеке тұрғын үй секторлары орналасқан Мәскеу, Құрмыш, Сүт зауыты, Шанхай аудандарын және елді мекендер мен саяжай тұрғындарын топан судан қорғау жұмыстары өз деңгейінде жүзеге асырылып жатыр деді  шаһар басшысы Ерхан Омаров. Қыс бойы қаладан  85 мың тонна қар полигонға шығарылған.