Шағын және орта бизнес иелері бұдан былай банк, әкімдік, салық комитетінің табалдырығын тоздырмайды. Ақтөбеде Кәсіпкерлік палатасы жанынан Кәсіпкерлікті дамыту орталығы ашылды. Шараға облыс әкімі Архимед Мұхамбетов пен өңірдің бизнес өкілдері қатысты. Ақтөбеде ашылған бұл нысан «Даму» қорының кеңсесінен кейін пайдалануға берілген екінші көмек орны. Мұндағы орталықтың ерекшелігі сол, техникасы мен барлық жағдайы жасалған кеңсе орындары қолжетімді бағамен жалға беріледі. Кейін облыс басшысы бастаған жұмыс тобы Сәңкібай батыр мен Әлия Молдағұлова даңғылдарының қиылысындағы жаңа саябақ, мейрамханалар құрылысымен танысты. Саябақты салуға бюджеттен 72 миллион теңгеден астам қаржы бөлінген. Мұнда велосипедшілер үшін 400 метрлік жол салынады. Ал қаз-қатар орналасқан мейрамханалардың асханасы да әртүрлі болуы қадағаланады. Өңір басшысы Архимед Мұхамбетов жұмысты бақылау кезінде темір жол өткелінің сапасын да бір қарап шықты. Ескі мешіттің сыйымдылығы он есе артты. Бұрын Алланың үйі 300 жамағатқа арналса, енді 3 мың адам бір мезетте мешітке келе алады. Құрылысқа бюджеттен 72 миллион теңгеден астам қаржы бөлінген. Оған мешіт алдындағы жанар-жағар май бекетіне берілген жер қайтарылып, көлік тұрағы ретінде қалпына келтірілді. Құрылыспен танысқан жұмыс тобы Құран оқытып, ертеңгі күннің тыныштығын тіледі. Биыл жол салуға бюджеттен 15 миллиард теңге қаржы бөлінген. Енді жол төсеуде жаңа әдіс кең пайдаланылады. Ақтөбенің 12-ші ықшам ауданында жаңа саябақ бой көтереді. Мұнда жаттығу орны, велосипед алаңы болады. Ағаш отырғызылып, гүл егіледі. Құрылыс жұмыстары күзге дейін жүргізілмек. Бұл іске 220 миллион теңге бөлінген. Ал банк жанындағы жер мемлекет меншігіне қайтарылып, мұнда мешітке, саябаққа арналған автотұрақ салынады. Болашақта Сазды өзенінен жаяу жүргіншілерге арналған тағы бір шағын көпір салынуы ықтимал.