Ақтөбеде бірде бір олимпиада чемпиондары мен жүлдегерлері жоқ. Олимпиадалық спорт түрлерінен әлем чемпиондарының өзі саусақпен санарлық. Келер жыл олимпиада жылы. Рио-де-Жанейроға жолдама алғандар қатарында ақтөбеліктер болуы қажет. Облыс әкімі Бердібек Сапарбаев жағдайды түзеуге мүмкіндік мол дейді. Тек уақыт, қаражат, білім мен біліктілікті тиімді пайдалану керек. Бердібек Сапарбаев өткен аптада облыстық теннис орталығында ақтөбелік спортшылар мен спорт жанашырларының басын қосты. Осы салада бар проблемалардың беті ашылды. Облыстағы спорт нысандарының материалдық-техникалық базасы төмен. Кадр тапшылығы мәселесе де өткір. Өңір басшысы облыстағы спорт федерациясының жұмысына сын келтірді. Жаңа жылдың басында әр спорт федерациясының басшысымен жеке-жеке кездесуді жоспарлап та қойған. Тек облыс орталығында емес, аудан, тіпті шалғай ауылдарда спортты дамыту қажет. Ол үшін республикалық, халықаралық жарыстарды жиі Ақтөбе жерінде өткізу қолға алынбақ. Спорттың жаңа түрлерінің дамуына мүмкіндік беру қажет. Әшім Қали облыс орталықтарында ұлттық олимпиада комитетінің филиалдары ашылса деген тілегін жеткізді. Ал "Ер Бақыт" әскери-патриоттық клубының төрағасы Марат Қойлыбаев мәслихатта спортшылардың мүддесін сөйлейтін депутаттар болса деді. Мүгедектер ұйымы мүшелері бірауыздан облыс әкімінен спортпен шұғылданушы мүмкіндігі шектелген азаматтарға арнап спорт орталығын тұрғызуға септік етуде сұрады. Қаладан ашылғанына көп бола қоймаған көркем гимнастика үйірмесінің жұмысын жүргізіп отырғандар болса, қала орталығынан ғимарат беруді сұрады. Облыс орталығына қарағанда қысқы спорт түрлерінен хабары бар хромтаулықтар лайықты орын, құрал-жабдықтардың жоқтығынан допты хоккей, конькимен жүгіру спортын жетілдіре алмай отырмыз дейді. Облыста спорт нысандарын тұрғызуға мемлекеттік-жеке серіктестік, кәсіпкерлердің әлеуметтік жауапкершілігі бағдарламалары кеңінен қолданылатын болады. Шетелден инвесторлар да тартылады деген жоспар бар. Келер жылдың бірінші тоқсанында-ақ тұрғызылып, пайдалануға берілетін тұрғын үйлердің жертөлесі міндетті түрде спорт залы ретінде жабдықталады. Аула клубтары көбейтіледі. Ал мүмкіндігі шектеулі азаматтар үшін спорт орталығын тұрғызуды әкімдік қолдап отыр. Сондай-ақ қаладағы "Достық" жүзу бассейні секілді спорт кешендерінде мүгедектер спортпен тегін шұғылданады. Мүмкіндігі шектеулі ақтөбеліктердің мәселелері бойынша Құралай Бәйменова Бердібек Сапарбаевтың кеңесішісі болып тағайындалғанын айта кетейік. Өзге елдерге, облыстарға кетіп қалған ақтөбелік спортшыларды қайтару үшін шәкіртақы тағайындау, спортшыларды баспанамен қамту секілді сұрақтар шешіледі. Облыс әкімі осы орайда дзю-додан әлем чемпионтаның күміс жүлдегері Рүстем Ыбыраевқа пәтер беруге уәде етті. Ақтөбедегі жоғарғы оқу орындарымен спорт түрлерінен жаттықтырушы, бапкерлер дайындау сұрағы шешіледі.