Облыс  әкімі Архимед Мұхамбетов кеше "Ақтөбе" футбол клубының ұжымын қабылдады. Өңір басшысы команда тек Қазақстан чемпионатында ойнап қана қоймай, отандық футболдың намысын еуропалық клубтық жарыстарда да қорғап, өз жанкүйерлерін қуантатынына сенім білдірді. 

Архимед Мұхамбетов жанкүйерлердің қызу, әдемі және нәтижелі ойынды күтіп отырғанын атап өтті. Жиын барысында команданың соңғы көрсеткіштері қаралып, облыс басшысы ойынға көңілі толмайтынын жеткізді. Бұл тек 1-ші кезеңнің көрсеткіші. Қызықты ойын алда екеніне сенімдімін,-деді облыс әкімі. Аймақ басшысы команданың ел чемпионатында сәтті өнер көрсетуіне тілек білдіріп, алғашқы алтылыққа ену міндетін жүктеді. "Ақтөбе" ел бірінішлігіндегі  бес ойынның біреуін ғана жеңіспен аяқтап, 4 рет тең түскен. Ал Қобыланды батыр атындағы орталық стадион  ел біріншілігіндегі ойындарды өткізуге  дайын емес. Күрделі жөндеуден өтсе де, алаң жаңартылмаған. Құрылысшылар бұл жұмысқа осы айдың  20-да кіріспек. Топырақты құрғату шарасы жүргізіледі. Ол үшін жергілікті бюджеттен 78 млн.теңге бөлінген. Дренаж алмастыру жұмыстарына мәскеулік мердігер жауапты. Алаң маусым айында дайын болмақ. Биылғы ел біріншілігі аясындағы ойындар әзір №8 спорт мектебінің  жасанды  алаңында өтіп жүр. Өз кезегінде бас бапкер Владимир Газзаев сенімді ақтайтындарын айтып, командаға көрсеткен қамқорлығы үшін облыс әкіміне алғысын білдірді. "Ақтөбе" футбол клубының кезекті ойыны 11-сәуір күні өтеді. Қарсыласы- қызылордалық "Қайсар".