2014-2015 оқу жылында қаладағы мектеп оқушыларын  оқулықпен қамтуға 31 млн 316 мың теңге бөлінді. Бұл қаражатқа аз қамтылған отбасы балалары үшін  52 мың 341 оқулық сатылып алынады. Ал 3-ші және  10-шы  сынып оқулықтары көмек алатын санаттағы отбасы балаларына  тегін үлестіріліп берілмек. Қаладағы  кітап дүкендерінде негізінен Алматы қаласынан жеткізілген оқулықтар сатылуда. Мәселен  "Студент" кітап дүкенінде 1 сыныптан бастап  оқулықтардың бәрі бар. Бағасы 540 пен 1650 теңге аралығында. Бұл жерде 1-сынып оқушысын оқу жылына 13 мың теңгеге даярлап шығуға болады. Дүкен иесінің айтуынша кітаптардың барлығы сұранысқа сай баспаханалардан тікелей сатылып алынған. Кітап құнының өсуіне оны жеткізуге жұмсалған қаражат әсер етеді. Қаладағы ірі орталық - Т.Ахтанов атындағы кітап дүкенінде де  баға  осындай. 1000-2000 теңге аралығында. Орталық базарларда кітаптар 600 бен 1200, 1800 теңгеге бағаланады. Сатылымдағы кітаптар жеткілікті, тек қалтада қаржы жеткілікті  болса дейді ата-аналар. Ал білім ордаларына тегін таратылатын кітаптар тамыздың 20-сы мен  25-і аралығында  жеткізіледі. Қалалық білім бөліміндегілердің айтуынша, биыл оқулық дауы болмайды. "Алматы кітап", "Атамұра", "Мектеп", "Арман-ПВ", "Білім"  баспаларынан шыққан оқулықтар сатылымға қойылған. Қазынадан бөлінген қаржыға 6 мың 437 оқушы оқулықпен түгел қамтылады. Биыл 3-ші және 10-шы кластың оқулықтары түгел жаңарды. Өткен жылы 2-ші және 9-шы кластың оқулықтары жаңартылған. Бұл іс әрі қарай жалғасын табады. Сонымен қатар "Өзін-өзі тану" пәнінің оқулық-әдістемесіне биыл 11 миллион теңгеге жуық қаржы бөлінді. Ағылшын тілінің оқулығына 10 миллионға жуық ақша бөлінген. Мемлекеттік лицей мен колледж оқушыларына 20 миллион теңгеге кітап сатылып алынды. Айта кетейік, мектеп оқушыларының қай оқулықты таңдайтынын білім ордасындағы педагогикалық кеңес шешеді.