Қалада көлік тонаушылар пайда болды. "Нұр Ақтөбе" ауданының тұрғындары темір тұлпарларын сеніп тапсыратын тұрақ болмағандықтан шығынға батып отыр. Кеше түнде белгісіз біреулер бір көліктің 4 доңғалағын шешіп, кірпішпен тіреп кеткен. Енді №15-ші үйдің тұрғындары қайда барып, кімнен көмек сұрарын білмейді. Көлік иесі Ақнұр Жұмағұлова жағымсыз хабарды көршілері арқылы естіді. Кешкілік аула ішіне қойып, таңғы сағат 7-де 80 мың теңгеге шығынға батқан. Олар "ұрылар ұсталады" деп үміттенеді. Сақтандыру компаниясына да арыз жазып қойған. Әзірге еш хабар жоқ. Зәулім үйлердің арасы тығыз. Көлік қою мүмкін емес. Көлік тұрағы  болмағандықтан көліктердің көбі кешкілік жүргіншілер жолын бөгеп тастайды. Кептелістен шаршаған, ұрылардан шығынға батқан тұрғындардың учаскелік полиция қызметкерінің жұмысына да көңілі толмайтын болып шықты. Қала әкімінің баспасөз хатшысы Лариса Томчуктің айтуынша егер инвестор табылса бұл ауданда ақылы паркинг салынады. "Нұр Ақтөбе" ауданындағы тағы бір мәселе - жолаушылар тасымалы. №2-ші бағыттағы қоғамдық көліктің жүрісіне  жұрт наразы. Айтуларынша, 10 адам отыратын, өзгесі бүкірейіп тұратын шағын автобусқа адамдар таңертең, кешкілік сыймай қалады. "Газель" автокөлігі әлдеқашан қала ішіндегі қатынастан шыққанымен, "Нұр Ақтөбе" ауданының тұрғындары үшін бұл жалғыз қатынас көлігі. Ал №29-шы автобустың аялдамасы алыс. Ол үшін  қариялар мен балалы аналар жарты сағат жаяу жүріп, жолды кесіп өтуі қажет.