Бұл білімділер сайысы. Берілген тапсырмаға мұқият ден қойып, есептің шешуін іздеп отырған №1-ші Ембі қалалық орта мектебінің 11-ші класс оқушысы Динара Елқолдина. Оның биыл облыстық олимпиадаға алғаш қатысуы. Бірінші кезеңде мүдірмей, бүгін екінші кезеңнің тапсырмасын орындады. Динара Ұлттық бірыңғай тестілеуден де төртінші пән ретінде химияны таңдаған. Болашақта тың жаңалық ашып, үздік химик болуда армандайды.
Жалпы білім беретін пәндер бойынша облыстық олимпиадаға барлығы 800-ден астам оқушы қатысып жатыр. Биылғы жылдың ерекшелігі - орта мектеп оқушылары мен гимназия, лицей шәкірттерінің білімі екі бөлек бағаланады. Екінші кезеңге өткен 700-ден астам оқушы тәжірибелік сынақты бүгін тапсырды. Олардың арасында орыс мектебінде білім алатын, қазақ тілін жетік меңгерген оқушылар да бар. Пәндік олимпиадаға қатысушы оқушылардың тең жартысы аудан, ауылдан келген. Олардың басым бөлігі жаратылыстану-математика бағытын таңдаған. Айте кетейік, жеңімпаздар 24-29- наурыз аралығында Петропавл мен Көкшетау қалаларында өтетін республикалық кезеңге жолдама алады.