Бүгін шаһарымызда жаңа мамандандырылған өрт сөндіру орталығы ашылды. Шараға ҚР Ішкі істер министрінің орынбасары Владимир Божко мен облыс әкімі Бердібек Сапарбаев қатысты. Алты шығу жолы бар өрт сөндіру бөлімі өзгелерінің жұмысын жеңілдетеді. Су жаңа автокөліктер және құралдармен жабдықталған мекемеде қызметкерлер үшін барлық жағдай жасалған. №3 мамандандырылған өрт сөндіру бөлімі бұдан былай қаладағы 4 өрт сөндіру бөлімінің жұмысын жеңілдетеді. Мүмкіндіктер артып, материалдық шығындар азаятын болады. "Батыс", "Болашақ", 11 және 12 ықшам аудандармен қатар Мәскеу ауданы мен әуе қалашығы енді осы бөлімнің қызметкерлерінің бақылауында. Алты бірдей су жаңа арнайы өрт сөндіру көлігі сақадай сай тұр. Ең бастысы 50 метрлік баспалдағы бар мына көлік өңірімізде әзірге біреу ғана. Мамандандырылған өрт сөндіру бөлімін салуға республикалық бюджеттен 850 млн. теңге бөлінген. Қажетті қызметтік, тұрмыстық құралдармен толық жабдықталған. Оқыту, өрт сөндіру жеңдерін кептіруге арналған мұнаралар, спорттық алаңдар да бар. 4 қабатты ғимаратта сондай-ақ, байланыс пункттері, қызметкерлерге арналған 20 бөлмелі жатақхана бар. Қазір шаһарымызда 600-ден астам өрт сөндіруші қызмет етеді. Тұрғындардың қауіпсіздігін толық қамтамасыз ету үшін қаламызда барлығы 12 өрт сөндіру бөлімі болуы қажет. Бізде тек 5 бөлім ғана бар. Мамандар "алда мемлекет тарапынан қолдау табылса, мұндай өрт сөндіру бөлімшесінің бірнешеуін салу жоспарда бар", -дейді.