Қалада мамандандырылған халыққа қызмет көрсету орталығы ашылды. Тәулігіне 1 мың адамның құжатын рәсімдейтін орталықта 50 адам қызмет етеді. Әзірге бұл жерге тек көлігі бар адамдар келе алады. Ешқандай қоғамдық көлік қатынамайды. Бірақ, қызмет көрсету аясы кең. Мұнда көлік құралдарын тіркеуге, жүргізуші куәлігін алуға болады. Екі қызмет үшін екі сағат жеткілікті. Жаңа мүмкіндіктері бар Халыққа қызмет көрсету орталығын облыс әкімі Бердібек Сапарбаев ашты. Мамандандырылған халыққа қызмет көрсету орталығы автоматтандырылған. Электронды бақылау жүйесі де бар. Осы арқылы емтихан тапсырылады. Енді емтиханды адам емес, техника бақылап, бағалайды. Орталықта техникалық байқау жүргізіледі. Ал куәлік алуға келген адамдар сынақты осы жерден тапсырады. Оларға арнап 7 көлік сатылып алынған. Жеңіл және жүк көліктері мен мотоцикл бар. Бүгін халыққа қызмет көрсету орталығы мерекелік демалысқа қарамастан келушілерге қызмет көрсетті. Осылайша жаңа мамандандырылған халыққа қызмет көрсету орталығы тәулігіне 1 мың адамның жұмысын бітіре алады. Орталық дүйсенді мен сенбі аралығында таңғы 9-дан кешкі 8-ге дейін жұмыс істейді. Мұндай ғимарат еліміздің екі өңірінде ғана бар. Бірі Ақтөбеде, екіншісі Қостанай қаласында.