Бүгін мұнай ұрлады, оны заңсыз сақтады, сатты деген айыппен ұсталған 9 күдіктіге қатысты сот үкімі шықты. Ұйымдасқан қылмыстық топ 2012-2013 жылдар аралығында қара алтынды қолды қылып, оны шетел асырып отырған. Мұнай қалдығы деп құжат толтырылғанымен, сатылған қара алтынның бәрі өңделмеген өнім болып шықты. Сонымен қатар тергеу барысында ұсталғандардың Багам аралдарында банк есепшоты бары анықталды. Олар 8 айда 700 мың тонна мұнай ұрлаған. Қылмыстық топ Ақтөбе, Атырау, Батыс Қазақстан облыстарында өз қитұрқы істерін жүзеге асырған екен. Негізінен мұнайды арзан бағаға сатып алып, оны Ресей арқылы Украинаға жөнелткен. Қылмысты  әшкере қылған қаржы полициясы өткен жылы Молдова мен Қазақстан азаматтарын ұстап, құқық қорғаушыларға тапсырды. Бүгін осы топтың алтауы бар мүлкінен айрылып, 8 жылдан  10 жылға дейінгі  мерзімдерге  бас бостандықтарынан айырылды. Ал қылмыстық топтың  тағы үш мүшесі 3 жылға сотталды. Олар жазаны шартты түрде екі жыл өтейді. Біреуі кедендік бақылау департаментінің маманы. Енді ол 3 жыл бойы мемлекеттік қызметте еңбек ете алмайды. Сот үкімі күшіне енген жоқ. Үкімге  қарсылар  15 күн ішінде сотқа аппеляциялық шағым түсіре алады.