Екі аптадан бері қалада мүмкіндігі шектеулі балаларды оңалтуға арналған «Жайна» орталығы жұмыс істеп жатыр. Емдік-уқалау қызметтерін үйде көрсетіп келген орталық енді науқастарды арнайы ғимараттың ішінде қабылдайды. Қазір мұнда 30 бала күнделікті ем алып жүр. 4 жасар Инабат Қуандық туғанынан мүгедек, қол-аяғы сал. Сырқат баланы туғандары жақында қайырымдылық қордың қаражатына Мәскеуге апарып, басын қаратқан. Жазда Украинадағы дәрігерлерге көрсетпекші. Инабатты әжесі бір аптадан бері осы орталыққа әкеліп жүр. Бұрын емдік-уқалау қызметтерін үйден алатын. «Жайна» орталығына келгелі баланың дамуында ілгерілеушілік байқалады, дейді әжесі. Массаж бен жаттығулардан бөлек бұл орталықта Инабат секілді балалар ойыншықты ұстап, саусақ қозғалтуды үйренеді. Тілі мүкіс балғындармен дефектолог жұмыс жасайды. Құлағы нашар еститіндер сурдодәрігердің сабағын алады. Неврологиялық ауытқушылықтары бар ұл-қыздармен психолог сөйлеседі. Сәуірдің 15-де ашылған орталық арнайы құрал-жабдықтармен жарақталған. Мұнда жүгіру жолағы, мүгедек балаларға арналған велосипед, сурдотренажер құрылғысы бар. Денесін ұстай алмайтын бүлдіршіндер құрғақ бассейнге жатқызылады. «Жайна» орталығы мемлекеттік тапсырыс бойынша жұмыс жасайтын үкіметтік емес ұйым. Биыл 96 балаға тегін оңалту қызметін көрсетеді. Мекеме директоры Нұрила Жарболованың айтуынша, осы уақыт аралығында үш бала сөйлеуді, оны жүруді үйренген.