Бүгін облыс әкімі Бердібек Сапарбаев өңіріміздің мәдениет қызметкерлерімен кездесті. Жыл сайынғы үрдіс бойынша арнайы дайындалатын баяндамалар оқылмады. Керісінше, облыс басшысы Бердібек Сапарбаев өнер адамдарын олардың шешілмей жүрген мәселелері мен сұрақтарын тыңдап, еркін пікір білдіруге шақырды. Халық алдында әрдайым жадырап, уайым-қайғысыз көрінетін жандарды толғандыратын дүние көп. Басты мәселелердің бірі - жалақы. Өнер ошақтарындағы тағы бір мәселе - кәсіби маманның тапшылығы. Болашақта жастар театрын ашуды жоспарлап жүрген Т.Ахтанов атындағы облыстық драма театрының директоры Нұрлыбек Жұбатқанның айтуынша, театрдағы қызметкерлердің дені өзге мамандық иелері. Өз ісінің мамандарын ұстап тұру қиынға соғады. Себебі, театр адам қуанарлықтай жағдайда емес. Үш театрдың басын біріктірген өнер ордасындағы қойылымдар үшін биыл бөлінген қаржы 4 млн. теңге ғана. Оны да үнемдеп жыл соңына дейін жеткізуге тура келген. Өмірлерін өнерге арнап, осы саланың ыстығы мен суығына төзген, жандары нәзік қауым бүгін осылайша өңір басшысының алдында шерлерін тарқатты. Облыстық мәдениет басқармасының бұрынғы басшылығына өз реніштерін де білдірді. Қызметінен алынған Нәзира Табылдинова өзіне қарата айтылған өкпе-наздың бәрін осы залда үнсіз отырып тыңдады. Қанша жыл сахнаның гүлі болса да, атаққа жарымай жүрген әншілер де жоқ емес. Бұрынғы басшының есігін жағалаумен табанын тоздырып, атақты сұрай-сұрай сөзін тауысқан әншілердің бірі жанайқайын жеткізді. Облыс басшысы бұл саладағы ахуалға қанық екенін айтты. Бердібек Сапарбаев алдағы уақытта қолда барды пайдаланып, мәдени мекемелерді толықтыру қажет екендігін атап өтті.