Мұғалімдер мен дәрігерлер жалақысы өседі
Жаңа жылдан бастап дәрігерлер, мұғалімдер мен мәдениет саласы қызметкерлерінің жалақысы өседі. Айлықты есептеудің жаңа жүйесін бүгін ақтөбеліктерге Денсаулық сақтау және әлеуметтік даму министрлігінің департамент директоры Гүлнар Әлімбекова таныстырды. Келесі жылдан бастап, дәрігерлер, мұғалімдер, мемлекеттік мекемелер мен қазыналық кәсіпорындардың өзге де қызметкерлерінің еңбекақысы жаңа модель бойынша төленеді. Жалақы қызметкердің білім деңгейіне, біліктілігіне, еңбек өтіліне, сондай-ақ орындалатын жұмыстардың қиындығы мен жауапкершілік дәрежесіне байланысты болады. Жалақы дифференциалды, яғни сараланған түрде өседі. Денсаулық сақтау саласында бір маманның еңбекақысы 7% -дан 28%-ға дейін, білім беру саласында 15%-дан 29%-ға дейін, өзге салаларда 28%-дан 40%-ға дейін артуы мүмкін. Бұған қоса, артық жасалған жұмыс пен мереке, демалыс күндері еңбек еткендерге бір жарым есе ақы төленеді. Сондай-ақ, қосымша атағы барлар да қосымша құн алады. Денсаулық сақтау және әлеуметтік даму министрлігінің мамандары қазір аймақтарға шығып, мемлекеттік мекемелердің бухгалтерлеріне азаматтық қызметкерлердің еңбекақысын жаңа жүйе бойынша есептеуді үйретіп жатыр. 2016-жылдың 1-қаңтарынан бастап, жалақы осы жүйемен төленеді.
Количество показов: 2010
Дата создания: 25.11.2015 18:36:43
