Мұғалім мен оқушы арасындағы дау. №51-ші мектеп гимназия оқушысы мен ұстазы арасындағы кикілжіңге қатысты Қылмыстық Кодекстің "Бұзақылық" бабы бойынша іс қозғалды. Оқушы мұғалім жұдырықпен ұрды деп отыр. 12 жастағы Темірлан Ізбасаровтың айтуынша, 28-ші қаңтар күні оны география пәнінің мұғалімі ұрған. Оқиғаны бүге-шігесіне дейін баяндап берген анасының айтуынша ұлының басы айналып, құсып, нәр татпаған. Таңдаулы мектеп ұжымы үшін бұл күтпеген оқиға болды. Директор күрсінеді, бірақ, екі тараптың келіспей қалғанынан іс насырға шабады деп әсте ойламаған. Қазір осы мектептің мұғалімдері 6-шы класс оқушыларының әлеуметтік желі арқылы уағдаласқан жазбасын ұстап жүр. Онда Темірлан өз кластасына "мұғалім бізді ұратынын айтшы" деп өтініш жасағанын анық көруге болады. Қазір мұғалім денсаулығына байланысты демалыста. Оған мектеп басшылығы сөгіс жариялады. Ашу басылмады, ушықты. Ал Темірлан Ізбасаров ауруханада ем алып шықты. Дәрігерлер "миы шайқалды" деп диагноз қойған. Істің ақ-қарасын тергеу анықтайды. Қазір осы оқиға бойынша Қылмыстық Кодекстің "Бұзақылық" бабы бойынша іс қозғалды. Ал денсаулығына байланысты учаскелік невропатологтің тіркеуіне алынған Темірлан осы апта тынығып, келер аптада сабаққа барады.