Қаламызда тағы бір мектептің құрылысы басталды. "Нұрлы жол" бағдарламасы бойынша Кірпішті ауылында  320 орынды білім ордасы бой көтереді. Үлкен жүк көліктері мен қазылған жер жаңа мектеп құрылысының басталғанын білдіреді. Мұнда қазір құрылыстың ең қиын тұсы жүріп жатыр. Жұмысшылар алдымен инженерлік желілердің бағытын өзгертеді. Мәселен, магистралды газ құбырын 15 метрге жылжытып, жер астынан өткізеді. Мектеп ауласындағы электр сымдарын да жыраққа орнатады. "Нұрлы жол" бағдарламасы бойынша салынып жатқан мектептің құрылысына 526 миллион теңге бөлінген. Бір ерекшелігі - мердігер компания әр кезеңдегі құрылыс жұмыстары аяқталған соң ғана мемлекеттен ақша ала алады. Қала әкімінің кеңесшісі Геннадий Дудаков бүгін  құрылыс жұмыстарының барысын қарап шықты. Мектептің жанында ескі білім ордасы бар. Жоспар бойынша енді екі мектеп ортақ спорт алаңын пайдаланады. Волейбол, баскетбол, теннис алаңдары да ортақ. Айта кетейік, Ақтөбеге Ұлттық қордан әлеуметтік бағдарламаларды іске асыру үшін  1 милллиард 150 миллион теңге берілді. Оның басым бөлігі "Нұр Ақтөбе" ықшам ауданындағы мектепке, қалғаны Қарғалы ауданындағы балабақшаға, Заречный-3 елді мекеніндегі 600 орынды мектеп пен осы Кірпішті елді мекеніндегі  білім ордасына тең бөлінген.