Бүгін облыстық  қылмыстық істер жөніндегі мамандандырылған ауданаралық сотында 43 жастағы педофилдің ісі қаралды. Өгей қызын зорламақ болған ер адамның ісі бойынша тергеу амалдары екі жылға созылған. 12 жастағы қыз баланы зорлауға әрекеттенген күдікті Мәртөк ауданы, Родниковка ауылының 43 жастағы тұрғыны. Күдікті азаматтақ некедегі әйелі жұмысқа кеткенде оның 12 жастағы қызын зорлауға бірнеше рет оқталған. Тергеу кезінде заттай айғақ  ретінде алынған жасөспірімнің іш киімі күдіктінің кінәсін дәлелдеді. Бүгін ол сот үкімімен 16 жылға бас бостандығынан айырылды. Облыстық мамандандырылған ауданаралық қылмыстық істер жөніндегі сотында ағайынды Есімовтердің ісі бойынша да үкім  шықты. Өткен жылдың желтоқсан айында қолға түскен үш ағайындыға аса ірі көлемде есірткі затын тасымалдап, сақтады деген айып тағылған. Есімовтер ҚР қылмыстық кодексінің 297-бабы, 3-бөлімі бойынша кінәлі  деп танылды. Сот үкімі бойынша ағайындылар жазаларын  қатаң  тәртіптегі  түзету мекемесінде  өтейді.