Қаңтар айының 8-і күні Мағаджан орман шаруашылығында жеке үйде газ баллоны жарылып, баспананың  күлі көкке ұшқан болатын. Зардап шеккен алты адамның біреуі жансақтау бөлімінде көз жұмды. Жарылыстан  опырылып түскен  үй несиеге алынған. Ай сайынғы төлем 46 мың теңге. 600 мың теңгедей қарызы қалған. Банк ақшасы өтелмеген үйдің орнын  қозғауға тиым салыпты. Ал аяқасты баспанасыз қалған отбасының тентіреп жүргеніне бір ай. Мағаджан орман шаруашылығы Қарғалы ауылдық  округіне қарасты. Чеверда отбасының туыстары  округ әкімінен көмек  сұраған. Жергілікті әкімдік мәселемен таныс. Қолдан келер бар көмек-жарылыс болған жерді тазартып, қоқыстарды  полигонға шығару дейді Алмаз Әлімбаев. Отанасы 43 жастағы Марина Чеверданы туыстары 9 күн бұрын жерлеген. Кірпішті ауылындағы зираттан жер алуға әкімдік жәрдемдескен. Ал жолдасы Евгений Чеверданың жағдайы қанағаттанарлық. Өздігінен жүріп-тұра алмайды. Қазір оған қарындасы Алла күтім жасап отыр. Денесінің 60 пайызын күйік шалған туысқаны Сергей Коваленко да төсекте жатыр. Ауруханадан оны 5 күн бұрын шығарған. Жарылыстан зардап шеккен тағы бір адам-Алла Маркевичті де туысқандары ертең шығады деп күтіп отыр. Ауруханадан шыққалы Чевердалардың жағдайын ешкім сұрап келмепті. Чеверда отбасында 4 бала тәрбиеленіп жатыр. Анасыз қалған  балалар қазір туысқандарын паналауға мәжбүр. Банк төлемдерді уақытша тоқтата тұруға рұқсат берген. Ал сақтандыру мәселесі арнайы құрылған комиссияның шешімінен кейін белгілі болады.