Бұл пәтер сату, сатып алу маусымы. Жаз басталғалы баспанасын кеңейтуді, ескіні сатып, жаңасын алуды мақсат еткен адамдар қатары артқан. Мамандардың айтуынша, доллар бағамының өсуі кезінде жылжымайтын мүлік сатып алуға күш салатындар көбейді. Себебі, пәтер түрлі депозиттен жақсы. Несиеге сатып алып, жалға беруге болады. Сөйтіп еш ақша жұмсамай, пәтер жалдаушылардың берген қаржысын банкке төлеп отырасыз. Әрине, бұл жұмыс істейтін, тұрақты табысы бар адамдардың таңдар жолы. Бірақ ақтөбеліктер үшін баспаналы болу әлі де қиын. Олар "үй бағасы қымбат" дейді.
Біздің қаламыздағы жарты ғасырлық тарихы бар үйлердің бағасы төмендеді. Қазір Тұрғындар қалашығындағы ескі үйлердің 1-бөлмелі пәтерін 25 мың долларға, ал екі бөлмелі пәтерді 30-32 мың долларға сатып алуға болады. Қаланың орталығында сәйкесінше баға қымбат. Ауданына байланысты Әбілқайыр хан даңғылы бойында, "Қазпошта" ауданындағы бір бөлмелі пәтерлер 33-35 мың АҚШ доллары аралығында.Ақтөбеде ғана емес, Алматы қаласында да пәтер бағасы арзандады. Таяуда ғана Алматы қаласындағы бір бөлмелі пәтер құнының құлдырауынан сату-сатып алу 20 пайызға артқан. Сарапшылар мүлік нарығындағы белсенділікті ипотекалық несиелендірудің қайта жанданғанымен байланыстырып отыр. Ақтөбеліктердің де 60 пайызы пәтерді несиеге алады екен.