Өткен жылы облыста 476 мың шаршы метр тұрғын үй пайдалануға берілді. Жалпы алғанда 3 мың 600-ден астам отбасы былтыр қоныс тойын тойлады. Бұл туралы бүгін облыстық маслихаттың кезекті отызыншы сессиясында құрылыс басқармасының басшысы Қанат Нұршин айтты. Облыстық маслихаттың бүгінгі сессиясы толықтай дерлік тұрғын үй құрылысына арналды. Жоспар бойынша осы жылы өңірде 457 мың шаршы метр тұрғын үй тапсырылуы тиіс. "Нұр Ақтөбе" ауданында 540 пәтерлі үш үй салынып жатыр. Бұл пәтерлер "тұрғын үй құрылыс жинақ жүйесі" бойынша банкте ақша жинап жүрген ақтөбеліктерге несиеге беріледі. Бұдан бөлек, ұлттық қордан 2 миллиард 500 миллион теңге бөлінеді. Ол ақша "Нұр Ақтөбе" ауданындағы тағы үш кредиттік үйдің құрылысына жұмсалады. Әкімдікте кезекте тұрғандарға жалға берілетін үйді салу үшін республикалық бюджеттен 903 миллион теңге бөлу көзделген. Құрылысы біткен соң, 251 отбасы пәтер кілтін алады. Оған қоса, коммуналдық, коммерциялық, жеке тұрғын үйлердің құрылысы жалғаса береді. Қазір үй кезегінде қала бойынша 16 мыңнан астам, облыс бойынша 25 мың адам бар. Депутат Мәжит Бекмеев бұл ретте құрылыс басқармасының басшысына көпшіліктің көкейінде жүрген сұрақты қойды. Ал, Кенжеғали Кенжебаев қаладағы құрылыстың сапасын сынға алды. Оның пікірінше, жаңадан бой көтерген әрбір ауданда барлық инфрақұрылым тұрғын үйлермен бір мезетте салынуы тиіс. Аймақтың бас құрылысшысы бұл сауалға жауап таба алмай тосылып қалды. Депутаттар облыстық құрылыс басқармасы басшысының тұрғын үй құрылысына қатысты жоспарын қолдады. Құрылыс қарқыны бәсеңдемесе, биыл да біраз адам баспаналы болады.