Елдің батысындағы діни ахуалдың бүгіні мен атқарылған жұмыстары өңіраралық семинарда кең айтылды. Әр өңірдің өкілі өздерінде атқарылып жатқан істерді жеткізді. Мыңдаған кездесулер мен түсіндіру жұмыстары, ақпараттық-насихат тобының аудан мен ауылды аралауы, халықпен тілдесуі көрсетілді. Бірақ қазақстандықтардың Сирияға аттануы, жат ағымның жетегіне еріп, қолына қару ұстау дерегі әлі күнге дейін тыйылмай тұр. Бұл бүгінгі семинарға қатысқан білікті мамандардың ақылдаса шешетін басты мәселесі. Орал және Ақтөбе архиепископы Антоний діни сауаттылыққа шетелде емес, ел ішінде үйрену керек екенін айтты. Сондай-ақ, қара киім киіп жүру қазақ ұлтына тән емес қылық екенін жеткізді. Діндәрдің бұл ойын облыс әкімі де құптады.Жиын елбасы Нұрсұлтан Назарбаевт "100 нақты қадам" Ұлт жоспарында айтылған конфессияаралық қарым-қатынасты үйлестіру және діни экстремизмнің алдын алу бағытын қамтыды. "Зайырлы қоғам және жоғарғы руханият - бірлік пен келісім кепілі" тақырыбын қамтыған семинарға Мемлекеттік хатшы Гүлшара Әбдіхалықова қатысып, нақты жұмыс жайын айтты. Мәселен, бақылауды, сараптауды күшейту, ұлттық құндылықты насихаттау тапсырылды. Тіпті, әлеуметтік желілердегі ықпалды арттыру қажет. Осал топты жұмыспен қамту, олардың бос уақытын қалай өткізетінін де қадағалау маңызды.Қазірде Ақтөбе облысында 10 конфессияны біріктіретін 89 діни бірлестік жұмыс жасайды. Ал Шалқар, Байғанин, Мұғалжар мен Темір аудандарында өңіраралық орталық құрылды. Бұл аудандар тектен тек таңдалмаған. Мақсат - жат ағымның арбауына түскен адамдарды бақылау. Олардың сауатын арттыру үшін мамандар жұмысы күшейтілуі қажет.Бұл қоғам ішіндегі жұмыс. Қазір теолог мамандар темір тордың әр жағында отырған адамдарды да ақпараттандыру жұмыстарына кірісті.Бұл кездесуге халықпен етене араласатын дін өкілдері мен ішкі саясат басқармаларының басшылары, қызметкерлері қатысты. Олар енді тәжірибеде оң нәтиже берген жұмыстарды негізге алып, халық арасындағы жұмысты күшейтетін болады.