Қ. Жұбанов атындағы Ақтөбе мемлекеттік өңірлік университетінде бүгін түлектерді жұмыс орындарына бөлу басталды. Ақтөбеден бөлек жұмыс берушілер көрші өңірлерден де келген. Олар жас мамандарға таңдау жасады. Оқу орны болса алдымен жергілікті сұранысты қанағаттандыруды көздейді. Ақтөбеге негізгі пән мұғалімдері және орыс тілінде білім беретін педагогтар жетіспейді. Жұбанов университетін білім грантымен оқыған 441 түлек бітіріп жатыр. Ал диплом алатындардың 128-і ауылдық квотамен оқығандар. Олар жолдама бойынша белгіленген жұмыс орындарына жөнелтіледі. Егер ұсынылған қызметке орналаспай, өз таңдауын жасаса түлек 4 жыл оқығаны үшін ақы төлейді. Жұмыс берушілер көрші өңірлерден де келген. Алайда алдымен Ақтөбенің сұранысын қанағаттандыру қажет. Облыстық білім басқармасына 318 мұғалім керек. Бүгін 172-сі түлектер арасынан табылды. Қ. Жұбанов атындағы Ақтөбе мемлекеттік өңірлік университетінің дипломы биыл 2407 қыз-жігітке беріледі. Соның 1020-сы педагогикалық мамандық бойынша. Бұл мұғалімдерге деген сұранысты қанағаттандыра алмайды. Мұғалім мамандығының мәртебесін асырып, жастардың осы кәсіпке қызығушылығын ояту үшін түрлі шаралар қолға алынған. Республикалық деңгейде "Үздік педагог", "Сынып жетекшісі" секілді байқаулар өткізіледі. Шалғай ауылдарға жас мамандар тарту мақсатында баспана, біржолғы көтерме сыйақы мәселесі шешілген. Педагогтардың жалақыларына да санат бойынша пайыздық үстемелер қосылады.