Биыл жаңа жылдық ас мәзірі қымбатқа түскелі тұр
Жаңа жылдың басталуына санаулы күндер қалды. 31 желтоқсан күні жайылатын дастарханға көп мән беретініміз рас. Әдетте нәзік жандылар Жаңа жыл молшылығымен келсін деген ниетпен сол күні түрлі тағамдар жасап, дастарханда бос орын қалдырмауға тырысады. Жаңа жылдық дастарханға көрік беретін басты дүние - жеміс-жидек. Қала базарларындағы жемістер бағасы күн санап өсіп жатыр. Мандариннің үш түрі бар саудада. Бағалары да әртүрлі. 450 теңгеден бастап, 500, 600 теңгеге дейін жетеді. Таңдаңыз да ала беріңіз. Қыс басталысымен жететін тәтті құрмалардың бағасы бүгін тағы 100 теңгеге қымбаттаған. Жаңа жылдық дастарханның келер жылдың иесінің бітім, болмысына сай келуі маңызды. 2016 жылдың иесі мешіннің азығы банан болса, оның құны дүкен сөрелерінде 400 теңгеден жоғары. Алда әлі көтерілуі мүмкін. Дегенмен, қазақ дастарханын етсіз елестету мүмкін емес. Сондықтан ас мәзірінде бұл тағамның алар орны ерекше. Базардағы ет құны да қымбаттаған. Жылқы еті 1300 теңгеден болса, қазы 1600 теңгеге сатылып жатыр. Ал, Мәртөк, Ырғыз аудандарынан әкелінген сиыр етінің келісі 950 теңге. Қазақтың етінен өзге мерекелік дастарханның сәнін келтіретін шұжық пен ірімшік, тауық аяғы мен бұқтырылған балық. Барлығының құны бұрынғыға қарағанда 15-20 пайызға қымбаттаған. Ақбалық пен ақсеркенің бір келісі 4000 теңге. Ал Өзбекстаннан тікелей жеткізілетін өрік-мейіздің сөрелерде түрі тұр. Сапасына қарай құны да жоғары. Келісі 2200-2300 теңгеден жоғары. Осының барлығын саралай келе, бір шағын отбасының жаңа жылдық дастарханына қажетті азық-түлік пен жеміс-жидектің ең төменгі құны шамамен 25-30 мың теңгеге шығатыны белгілі болды.
Количество показов: 1996
Дата создания: 22.12.2015 18:56:58
