Бүгін пәтер кезегінде тұрған ақтөбеліктерден құжат қабылдана бастады. Жасы келіп зейнетке шыққандар, мүгедек балалары бар ата-аналар мен оралмандар, көп балала отбасылар енді "Тұрғын үй құрылыс жинақ банкі" арқылы берілетін баспанаға қол жеткізе алады. Тұрғын үй қорын есепке алу секторының мамандары 5-6 сағаттың ішінде 150 адамды қабылдап, 63 арызды рәсімдеген. "Тұрғын үй құрылыс жинақ банкі" арқылы берілетін пәтер тек қалалық тұрғын үй қорында кезекте тұрған адамдарға тиесілі. Банкте есепшоты болуы міндетті емес. Несие 4-8 пайызбен беріледі. 1, 2, 3 бөлмелі пәтерлердің аумағы да әртүрлі. Жалақысына қарап, төлем қабілеті анықталады. Үстел басында қаздай тізілген мамандар шамамен есептеп, кеңес те береді. Бірақ, соңғы шешімді банк айтады. Тұрғын үй қорында есепте жоқ адамдар пәтерге қол созбаса да болады. Әлеуметтік осал топ, мүгедек балаларды бағып отырған отбасы, жетімдер, оралмандар, көп балалы отбасы, жасы келіп зейнетке шыққандар, бюджеттік мекеме қызметкерлері. Тізім осы. Наурыздың 10-ы мен 20-сы аралығында құжат тапсырғандар сәуірдің 10-ы күні нәтижесін біледі. Оларға пәтер кілті жазда берілуі мүмкін. Оған дейін салынған үйлерге коммуналдық желілер тартылады. Алда-жалда төлем қабілеті расталмағандар кезектен түсіп қалмайды. Олар алдағы уақытта өзге бағдарламалар арқылы тағы байқауға қатыса алады. Айта кетейік, Ақтөбеде пәтер кезегінде 16 мыңнан астам адам тұр.