Енді  жасы 12-ден және салмағы 36 келіден аспайтын  балалар арнайы бөлек орындықтармен, қосымша бекіткіштермен тасымалдануы тиіс. Ертең күшіне енетін заңға сәйкес, алдыңғы жолаушылар орындығына авто-орындықтар орнатылуы керек. Ал артқы орындықта балаларға арналған, бекітілетін құрылғысы бар авто-орындық немесе балаларды қауіпсіздік белдіктерімен нық бекітуге мүмкіндік беретін өзге де жабдықтар болуы шарт. Осы талаптарды елемеген жүргізушілерге 5 айлық есептік көрсеткіш көлемінде айыппұл салынады, ал бұл дегеніміз 9910 теңге. Жаңа ереже барлық көліктерге бірдей. Соның ішінде такси қызметтері де тиісті талапты орындауы тиіс. Демек таксилердің ішінде де балаларға арналған орындықтар немесе бекіткіш құрылғылар болуы қажет. Ішкі істер министрлігі әкімшілік полиция комитеті басқармасының бастығы Қанат Сәдуақасов кісі тасуға жағдай жасауды емес, таксист болсын, жеке меншік көлік иесі болсын, балаларды тасымалдаудың қауіпсіздігін қамтамасыз етуді ойлауымыз керек деді. Алайда бүгін біз хабарласқан такси қызметтерінің бәрі бірдей жаңа заңды орындауға сақадай сай болмай шықты. Күмілжіп отырғандары жетерлік. Жаңа ереже нарықта тағы да дүрбелең туғызды. Авто-орындық пен бустер сататын арнаулы дүкендер пайдаға батқалы тұр. Қалада балалар үшін жасалған құрылғы балалар дүкендерінде ғана саудада екенін білдік. Олардың бағасы әртүрлі. Күн өткен сайын шарықтай беруі де ғажап емес. Тіпті соңғы күндері сатып алушылар күрт көбейген. Бустердің бағасы 3500-нан, авто-орындықтардың бағасы 20 мыңнан басталады. Олардың бәрі де  бала денсаулығы үшін қауіпсіз. Біріншіден баланың омыртқасы жақсы дамиды және басы орнықты орналасады. Бәрібір заңға бағыну қажет деп білетін ата-аналар қоғамдағы түрлі пікірсайыстарға араласпастан, қажет құрылғыларды сатып алып қойды.