Ақтөбеде бүгін бүлдіршіндерге балабақшаға жолдама беру басталды. Құжаттарды қабылдау рәсімі "Металлургтер" мәдениет үйінде өтіп жатыр. Қалалық білім бөлімі мамандарының айтуынша, биыл жолдаманы 2012 жылы туылған бүлдіршіндер алуы тиіс. Ақтөбеде балабақша кезегін 29 000 бүлдіршін күтіп отыр. Алайда жолдама тек 5000 балаға ғана берілмек. "Металлургтер" мәдениет үйіндегі кезекті тәртіп сақшылары қадағалап тұр. Ата-аналар таңғы сағат 5-тен бастап жиналған. Баласын жетектеген, құндақтағы сәбиін құшақтаған аналар да бар. Бәрінің үміті бір - перзентін мемлекеттік балабақшаға орналастыру. Жолдама беру уақыты таңғы сағат 9 бен кешкі 6-ның аралығы. Бұрынғыдай ұзын-сонар кезек жоқ. Құжат қабылдау кестеге сай жүргізілуде. Бүгін, алғашқы 2 сағаттың ішінде 80-ге жуық ата-ана жолдама алып үлгерді. Ал ертең, әскери қызметкерлердің құжаттары қабылданбақ. Көп балалы отбасы, 1,2-топтағы мүгедектер мен әскери қызметкерлердің балалары жеңілдікке ие. Оларға жолдама 1-ші кезекте берілуі тиіс,-дейді мамандар. Ең бастысы жеңілдіктерін дәлелдейтін анықтамалары болуы шарт. Айта кетейік, Ақтөбеде 44 мектепке дейінгі ұйым бар. 23 балабақша жеке меншік. 2 бөбекжай мен 21 шағын орталық тіркеулі.