Бүгін қарашаның екінші дүйсенбісі - жетімдер күні. Ақтөбедегі "Үміт" сәбилер  үйінде 67 бала тәрбиеленіп жатыр. Олардың тең жартысы туа бітті сал ауруына шалдыққан. Биыл 20 баланы асырап алған. Жетімдерді бауырына басып, қамқоршы боламын дейтіндердің дені сау бала сұрайды. Ал сал балаға сұрау болмай тұр. 4 жастағы Әлия  туа бітті сал ауруына шалдыққан. Сәбилер  үйіне бір жасында түсті. Анасы бұл жерге баланы әкелген кезде кейін қайтып аламын деп мамандарды сендіріп кеткен.  Бірақ, жағдайымды түзеп аламын деген ана сол кеткеннен мол кетті. Мамандар  Әлияның анасына іздеу жүргізген кезде оның тұрмысқа шыққаны белгілі болды. Қазір оны Алға балалар үйіне аудару үшін  құжаттар дайындалып жатыр. Ресейлік дәрігерлердің көмегімен Әлияға екі рет ота жасалды. Қазір көзіне көзілдірік киеді, шауып жүр. Мың бұралып билеп, таңдайы тақылдап тақпақ та айтады. Жетімін жылатпаған бабалар заманында "балалар үйі" деген ұғым болмады. Қазіргі қоғамда мұндай орталықтар әр қалада бар. Мамандар тастанды балалар саны 5-6 жыл бұрынғы жағдайдан азайды дейді. Бірақ, қаламыздағы 80 орындық  сәбилер үйі бос тұрған жоқ. 67 бала тәрбиеленіп жатыр.