Өмірін бала оқытуға арнаған педагогтарға  құрмет көрсетілді. Оқушылар концерттік бағдарламаға қатысып, келген қонақтарды гүл шоқтарымен қарсы алды. Ұлағатты ұстаздар қашанда үлкен құрметке лайық. Оларға ғалым да, шахтер да бас иген. Ал ақтөбелік мұғалімдер бүгін қызыл кілеммен жүріп өтті. Апайлар мен ағайларды  өңіріміздің бас ұстазы Жанат Самұратованың өзі қарсы алып жатты. Мейрамхана төріне жайғасқан қонақтарға  Қазанғап атындағы балалар өнер мектебінің шәкірттері ән мен биден шашу шашты. Ал Есет батыр атындағы облыстық мамандандырылған көпсалалы лицей-интернатының оқушылары гүл шоқтарын үлестірді. А.Жұбанов атындағы Ақтөбе музыка колледжінің студенттері концерттік бағдарлама ұсынды. Мейрамханаға 250-ден астам ұстаз шақырылған. Өткен аптадан бері айрықша құрметке бөленіп, мерейлері  өскен мұғалімдерді бүгін облыс әкімі Бердібек Сапарбаев та құттықтады. 

Шара барысында өз мамандығының  нағыз шеберлері деп танылған 100 мұғалім ҚР Білім және ғылым министрлігінің Құрмет грамоталарымен, төсбелгілерімен, облыс әкімінің бағалы сыйлықтарымен марапатталды.