Бүгін таңертең араларына 15 минут салып қала көшелерінде төрт жаяу адамды көлік қақты. Жанқожа батыр мен Қарасай батыр көшелерінің қиылысында жүргіншілер жолына аяқ басқан әйелге «Ваз - 2114» көлігі соққан. Ал, 312-атқыштар дивизиясы даңғылы бойында бір мезгілде жол апатынан үш кісі зардап шекті. Шамамен жасы қырықтар шамасындағы мына әйел Жанқожа батыр көшесінен өтпек болған. Жүргіншілер жолағына енді ғана аяқ басқан оны «Ваз - 2114» көлігі соғып өтті. Жүргізуші - 21 жастағы жігіт. Көлік жүргізгеніне екі жыл толған. Өзі де есеңгіреп қалған жігіт жедел жәрдем көлігі жеткенше зардап шегушінің жанынан кетпеді. Қолынан келгенше алғашқы көмек көрсетті. Апат орнына жеткен дәрігерлердің айтуынша, әйелдің бас миы шайқалған, жағдайы орташа. Ол облыстық жедел жәрдем ауруханасына әкетілді. Қазір нейрохирургиялық бөлімшеде жатыр. Маңайдағы тұрғындар Жанқожа батыр көшесі екі бағытты боп өзгергелі жол апатының көбейіп кеткендігін айтады. 312-атқыштар дивизиясы даңғылы бойында «Қазтрансгаз» мекемесінің екі қызметкерін «Ваз-2115» көлігі қаққан. 57 және 45 жастағы екі әйел де жүргіншілер жолағымен кетіп бара жатқан. Куәгерлердің айтуынша, соққының қатты болғаны сонша, әйелдердің бірі бірнеше метрге ұшып кеткен. Ауыр жарақат алған ол қазір темір жол ауруханасында жатыр.