Бүгін Ақтөбе қаласының құрылған күні
14-мамыр - Ақтөбенің іргесі қаланған күн. Жай ғана уезден облыс орталығына айналған шаһарымыз 146 жылдың ішінде талай құрылыстың куәсі болды. Әлі де аумағы кеңейіп, ауқымы артып келеді. Облыстық тарихи-өлкетану музейі ұсынған тарихи деректерге сүйенсек, 1869-жылдың дәл осы күні Ақтөбе жерінде алғашқы құрылыс жұмыстары жүргізіле бастаған. Кейін халық арасынан старосталар сайланып, бекініс уезге айналып, құтты мекенге халық қоныстана бастады. Әйтсе де қаланың ресми туған күні 28-мамыр болып есептеледі. Қалай болғанда да әр мамыр сайын қадамын мамырлата басқан арайлы қаламыз бір жылға есейіп, көркейіп, дамып, өз тұрғындарына ыңғайлы қала атануға талпынып келеді. Бүгін 146-ға толған қаламыздың алдында тұрған міндеттер орасан. Ақ төбенің басындағы шаһарымыздың мегаполиске айналу мақсаты да бар. Өңіріміз - ірі өнеркәсіп аймағы. Республика бойынша облысымыз көлемі жағынан Қарағандыдан кейінгі екінші орында, қаламыз болса Алматы, Астана, Шымкент, Қарағанды қалаларынан кейінгі бесінші сатыда. Соңғы санақ бойынша халық саны 388 мың адам. Облыс пен қала биліктерінің ендігі мақсаты - қаланы миллиондар мекеніне айналдыру.
Количество показов: 2533
Дата создания: 14.05.2015 19:22:02
