Бүгін екі адамды өлтірген қылмыскер 18 жылға бас бостандығынан айырылды. Бұл үкімді бүгін облыстық қылмыстық істер жөніндегі мамандандырылған ауданаралық сотының судьясы Ахметқали Молдағалиев шығарды. Сотталушы өзінің жұмыс берушісі, аяқ киім бутигінің иесі Ринат Мұхамбеталин мен ата-анасының көршісін өлтіргені үшін кінәлі деп танылды. Ол алғашқы қанды қылмысын 2012 жылдың  қыркүйегінде жасаған. Қала сыртындағы саяжайда өзінің жұмыс берушісі, аяқ киім бутигінің иесі Ринат Мұхамбеталинді өлтіріп, денесін көміп тастаған. Сол жылы Литвинов сауда үйінде аяқ-киім сатушысы болып жұмыс істеген. Алайда ол көп ұзамай жұмыстан шығып кетеді. Кәсіпкерді өлтіргендігі туралы құқық қорғаушыларға оның азаматтық некедегі әйелі хабарлапты. Ал, Ринат Мұхамбеталинді туыстары екі жылдан астам уақыт бойы іздеген. Қандықол қылмыскер үш жылдан соң тағы бір адамға ажал құштырды. Осы жылдың 17 қаңтарында  Иманов көшесінде тұратын ата-анасының көршісін балтамен ұрып өлтіріп, 76 250 теңгесін қолды қылған. Көрші әйелдің  ақыл айта бастағанын өзін кемсіту деп түсініп, өлтіріп тынған. Кейін сотталушының әйелді 20 рет басынан ұрғаны анықталды. 23 жастағы Вадим Литвинов жазасын қатаң тәртіптегі абақтыда өтейді. Тексеру нәтижесінде одан  психологиялық ауытқушылықтар анықталмаған.