Ащы су адамды түзу жолдан тайдырады. Бүгін Елек полиция бөлімінің кәмелетке толмағандар ісі жөніндегі учаскелік инспекторлары арақты серік еткен отбасыларға барды. Арайлым Жарқылова екі баланың анасы. Үлкені 11, ал кішкентайы 6 жаста. Ұлы қазір 5-ші класта оқиды. Мына мақтау қағаздарына қарап, "жаманнан жақсы туады, адам айтса нанғысыз" деген нақыл сөздер ауызға оралады. Ұлы күні кешеге дейін үздік оқыды. Балалардың алдын бермеді. Қазір кей сабақтардан төрт деген баға алып жүр. Бұл отбасындағы тұрақсыздыққа, жайсыздыққа байланысты екені сөзсіз. Ал анасы Арайлым өз-өзіне уәде бергенімен, ащы судың жетегіне еріп кетуін тоқтатқан емес. Бөлме іші екі аттам ғана. Мұнда 4 жан тұрады. Еденде жаю да жоқ. Тек көрпе төсеулі жатыр. Арайлым Жарқылованың айтуынша, отағасы күнара 2 мың теңге нәпақа табады. Өзі жұмыс істемейді. "Балаларыма қараймын" дегені жай сылтау секілді. Енді мұндай жағдай жиі қайталанса, бала құқығы тапталса, отбасы мәселесін комиссия шешеді. Учаскелік полиция инспекторлары есептегі отбасыларды ай сайын, кейде апта сайын тексереді. Сәуірдің 1-і мен 10-ы аралығында өтіп жатқан республикалық алдын-алу шарасы кезінде күнде қадағаланып жатыр. Қанша ескерту болғанымен, әзірге арақтың соңына ергендердің уәдесі құр сөз күйінде қалып тұр.