Ардагерлер мен олардың артында қалған отбасылары үшін бүгін - қос мереке. 8 отбасы бүгін баспаналы болды. Облыс әкімі Архимед Мұхамбетов Жеңіс күні қарсаңында пәтер сертификаттарын тапсырды. Жыл өткен сайын Жеңісті жақындатқандардың қатары селдіреп барады. Облыста қазір сұрапыл соғысқа қатысқан 160 қария бар. Бүгін облыс басшылығы ҰОС ардагерлеріне арнап дастарқан жайды. Марқұм болып кеткендердің жесірлері де қатысты. Кенжеғыз Дүйсенғазы- Ойыл ауданының тумасы. Жолдасы Сәркенай ақсақал осыдан 5 жыл бұрын қайтыс болған. Соғыс ардагері майданнан оралған соң, 30 жыл бойы ауылда қой баққан. 10 баланы бағып-қағып өсірген. 12 жылдан бері пәтер кезегінде тұрған. Бүгін ардагердің жесіріне пәтер сертификаты тапсырылды. Кенжеғыз әже секілді тағы 7 отбасы қоныс тойын тойлайтын болады. Бүгін облыс әкімі Архимед Мұхамбетов 3 ҰОС ардагеріне, 3 ардагердің жесіріне және 2 дүниеден озған ардагердің отбасына сертификат тапсырды. Қалалық тұрғын үй қорын есепке алу бөлімі басшысының айтуынша, барлығы да үй кезегінде тұрғандар. Баспана "Нұр-Ақтөбе" ауданынан беріледі. Қазір көп қабатты үйдің жан-жағын абаттандыру жұмыстары аяқталуға таяу. Мерекелік шараға қатысқан өзге еңбек ардагерлеріне естелік сыйлықтар таратылды. Өнер ұжымдары соғыс жылдарындағы әндерді орындады.