Ұлы Отан соғысының ардагері Керей Тағыбергеновтың немересі атасына тиісті медальді іздеп жүр. Майдангер 1943 жылдың шілдесінде Воронеж түбіндегі шайқастан соң "Ерлігі үшін" үкіметтік наградасына ұсынылып, қазан айында марапатталған. Ардагердің әскери кітапшасында мұны растайтын жазу бар. Алайда, ол медаль ақсақалдың қолына ақыры жетпеген. Жанар Тағыбергенова екі жыл бұрын атасы Керей Тағыбергеновтың соғыста хабарсыз кеткен туған ағасы Қалиді іздей бастаған. Сөйтіп, ғаламторды ақтарып отырып, "Подвиг народа" сайтына кірген. Онда Жанар өз атасы туралы тың деректерге тап болды. Жанардың қолындағы құжаттарға қарағанда, Керей Тағыбергенов 1914 жылы туылған. 1941 жылы Қызыл армия қатарына шақыртылған. 1942 жылдың шілдесінде Воронеждің Чижовка селосы үшін шайқасқа қатысып, сонда жараланған. Бұл ұрыста Керей қаруластарымен бірге жаудың үш оқ ату нүктесін, екі бақылау пунктін және 60 шақты неміс офицерінің көзін құртқан. Дәл осы ерлігі үшін артиллерия командирі Керей Тағыбергеновті "Ерлігі үшін" үкіметтік наградасына ұсынған. Керей Тағыбергенов 1944 жылдың маусымында  иық жарақатымен елге оралды. Ал, 1978 жылы ауыр сырқаттан көз жұмған. Соғыс ардагерінің қазір жеті баласы, 11 немересі, 7 шөбересі бар. Олар батыр аталарына тиесілі медальді тапқысы келеді. Бұл мәселе бойынша  біз бүгін қалалық қорғаныс істері жөніндегі басқармаға хабарластық. Ондағылар соғыс ардагерінің туыстары қолдағы бар құжатты жинап, басқармаға келсін деп жөн сілтеді.