Қала іргесіндегі Қарғалы ауылында спортқа ерекше мән беріліп келеді. Оған дәлел өткен сенбіде ашылған жаңа спорт ғимараты. Осыдан 35 жыл бұрынғы көне балалар және спорт мектебі жалпы ауданы 4468 шаршы метр болатын жаңа екі қатарлы ғимаратқа көшті. Айта кетейік, бұл мектеп өз тарихында халықаралық дәрежедегі спорт шеберлері мен Азия чемпиондарын тәрбиелеп шығарған. Материалдық базасын нығайтып алған спорт нысанында ендігі жерде әлемдік додаларда топ жаратын саңлақтар шығып қалуы мүмкін. Бұл ауыл тұрғындарының тілегі. Қарғалы спорт мектебінің жаңа ғимаратының ашылуына облыс әкімі Архимед Мұхамбетов қатысты.  Ол қарғалылықтардың қуанышына ортақтасып, болашақта халықаралық алаңдарда үлкен үміт күттірер спортшылардың болатынына сенім білдірді.Кең ғимаратқа бұдан былай көп бала қабылдауға мүмкіндік бар. Күрес залында бір мезетте 200 палуан жаттыға алады. Ал түрлі командалық ойындар залына 100 спортшы сыяды.   Дене шынықтыратын жаттығу залының ауданы 158 шаршы метр. Жалпы ауданы 28 шаршы метр болатын сауна мен бассейн де бар. Жаттықтырушылар саны 25. Облыстық құрылыс департаментінің тапсырысы бойынша құрылыспен "Әлихан Ойл-3" ЖШС айналысқан. Ғимарат пайдалануға 1 жыл ішінде тапсырылды.