Қалалық орталық мешітте де құрбандық шалуға жиналған кісі қарасы көп болды. Бұл жерде қала тұрғындарына бар жағдай жасалған. Аудан шаруалары әкелген қой мен тоқтыға арнайы орын берілген. Сонымен қатар қасапшылар да үздіксіз жұмыс істеді. Қой басы мен сирағын үйіту үшін де арнайы орын қарастырылған. Бұл Рахима Қазбекова секілді көпқабатты үйде тұратын қала тұрғыны үшін өте қолайлы. Осы жерден қой сатып алып, қасапшыға сойдырды. Сөйтіп, Рахима апа биыл 18-ші рет құрбандық шалды. Мешіт маңындағы ұсақ мал Темір ауданынан әкелінген. Бағасы 15 мың теңгеден басталады. 150 бас қой, тоқты жоспар бойынша екі күнде сатылып кетуі тиіс. Алла Тағала разылығы үшін құрбандық шалған қала тұрғындарымен қатар мұнда ет сұрап, қайыр тілеп жүрген адамдар саны көп болды. Есік алдында, тіпті мал сойып жатқан адамдардың жанында қолдарына дорба ұстап, ашықтан-ашық ет сұраған өзге ұлт өкілдері де кездесті. Арбаға таңылған қария мен кішкентай бала да әркімге бір жалтақтап, абыр-сабыр болған халықтың арасында жүр. Мешіт қызметкерлері оларды сабырға шақырғанымен, бәрі де "жағдайы төмен адамдарға беріледі деп айтылды" деген уәжді алға тартты. Ал артылғаны жетім-жесір мен көп балалы отбасыларға беріледі. Құрбандыққа шалынған мал еті бүгін ғана емес, ертең де таратылады. Мешіт қызметкерлерінің айтуынша, өткен жылы әр адамға 2-3 келіден ет таратылған. Биыл да осы мөлшерде үлестіріледі.