Қалалық сал ауруына шалдыққан азаматтарды қолдау орталығы мүмкіндігі шектеулі ақтөбеліктерді тасымалдау қызметін осыдан 10 жыл бұрын бастады. Әйтсе де жұмысбасты мүгедек жандарды діттеген жеріне жеткізіп қана қоймай, күтіп, кейінгі бағытпен тасымалдайтын инватакси қызметі кей кездері тапсырыс қабылдап үлгермей жатады. Бұл қолайсыздық бірінші кезекте инватаксидің тапшылығына байланысты. Бұған мүмкіндігі шектеулі жандардың белсенді өмір сүруі, өздеріне қолайлы жұмыстарға орналасуы да себеп. Ал ата-аналары туа бітті сал ауруына шалдыққан балаларын түрлі емдік курстарға тасиды. Олардан тапсырыс жиі түседі. Тапсырыс бойынша уақытылы қызмет көрсету үшін қалаға кемінде 10 арнайы көлік қажет. Бүгінгі таңда орталық балансында 4 арнайы көлік бар. Олардың екеуі жеңіл, ал қалған екеуі арбаға таңылғандарды гидравликалық механизм арқылы көтеріп мінгізетін көліктер. Кейінгі бағытты қоспағанда күніне 8 шақырту түседі. Инватакси күн сайын таңғы сегізден кешкі жетіге дейін қызмет көрсетеді. Қызмет тегін. Тек мүгедектікті куәландыратын құжат болса болғаны.