Елімізде ұлттық валюта тағы да құнсызданады деген ақпарат қаншалықты нанымды? Өткен аптадан бері  бұл мәселеге қатысты  елдегі сарапшылар түрлі болжамдар жасай бастады. Тіпті қалтасында тиын-тебені ғана бар қарапайым тұрғындар да елеңдеп отыр. Тіпті ешқандай девальвация болмайды деген мәлімдемелерге де  сеніңкіремей отырғандар бар. Алайда Ұлттық банк  бұл валюталық алыпсатарлардың қитұрқы әрекеті деп отыр. Қазақстан қаржыгерлер қауымдастығы теңгеге қатысты ақпардың шындыққа жанаспайтынын мәлімдеді. Алайда  сыбыстар халық арасында теңгеге деген сенімсіздік деңгейін арттырып, азаматтар жиған ақшаларын өзге елдің валютасына ауыстыруға асықты. Ал ақша айырбастау нүктелеріндегі  кассирлердің айтуынша, шет елдік валютаны сатып алушылар саны соңғы жұмада ғана көп болған. Теңгеміздің құны көбіне көрші Ресейдегі саяси жағдайға, оларға батыс елдері тарапынан салынған экономикалық санкцияларға, сәйкесінше Ресей рублінің тұрақтылығына байланысты. Естеріңізге сала кетсек, теңгенің құны соңғы рет 14-ақпанда құлдырады. Сол күн "қара сейсенбі" деген атауға ие болды. Ал ұлттық валютамыздың бір долларға шаққандағы  қазіргі ресми бағамы - 182 теңге 4 тиын. Енді теңгенің құнсызданатыны туралы жалған ақпарат таратқан адамды тауып, жазалау тиісті органдардың міндеті. Өйткені жаңа Қылмыстық кодексте жалған ақпар таратушыларды жауапкершілікке тартуды қарастыратын бап бар.