Ал 12-ықшам ауданда құбыр салу үшін қазылған орға бір адам түсіп кетті. Оқиға кеше түнгі сағат 11 жарымдарда болған. Мырзабек өзінің жанұясымен бірге кеше кешкі асын 12-ші мөлтек аудандағы мына кафеден ішпекші болыпты. Түнгі 11 жарымдарда қолына Мырзабектің баласын ұстап, кафеден бірінші болып шыққан оның туған ағасы кафе алдындағы шұңқырдың ішіне құлаған. Абырой болғанда қолындағы 2 жасар балаға ештеңе болмаған, бірақ, өзі арқасынан жарақат алған. Інісі Мырзабектің сөзінше, кафе жиегіндегі гүлдерді суарып жүрген қызметші әйел шетте жатқан  құбыршекті тартып қалып, ол зардап шегушінің аяғын  іліп кеткен. Аяқтары шлангқа  оралған ол, шұңқырға арқасымен түсіпті. Зардап шегуші қазір үйінде ем қабылдап жатыр. 2 жасар балаға ештеңе болмағанымен, қатты  шошып қалған.  Белгілі болғандай, дәл осы учаскедегі қазба жұмыстарына "Байлы" мердігер мекемесі жауапты. Олар ордың аумағы қоршалғанын алға тартып отыр. Әйтсе де Мырзабектің айтуынша, шұңқыр айналасында ешқандай да ескерту лентасы болмаған. Келіп-кетушілер кешкілік көбейетін кафе басшыларының  маңайды неге жарықтандырмағаны да белгісіз. Бұл туралы ешкімнен сұрап-білу мүмкін болмады. Еңбек демалысының шырқы бұзылған Мырзабек бұл жағдай өзгелерге сабақ болсын дейді. Өйткені жаз басталысымен қаламыздың әр тұсында қазба жұмыстары қызатыны белгілі. Қазір қалада ор қазылмаған жер аз.