312-атқыштар дивизиясы даңғылында орналасқан асфальт-бетон зауыты уақытша жұмысын тоқтатты. Өндіріс орнының директоры Николай Буканевтың айтуынша, қала ортасындағы зауыт тұтынушылар құқығын қорғау басқармасының ұйғарымына сай кешеден бері жұмыс жасап жатқан жоқ. Қазір мұнда бір ауысымда 400 тоннаға дейін асфальт шығаратын құрылғылардың бәрі тоқтап тұр. Осыдан екі-үш күн бұрын зауыт Некрасов  көшесін асфальттауға  өнім өндіріпті. Директор «жұмыс қатты қызды, оны мойындаймыз» деді. Шаң өте майда, сол себепті  ауаға қатты көтеріледі деп те ақталды. Зауыт басшысы өндіріс орнын түгелімен өзге аймаққа көшіру үшін 20 млн теңгедей қаражат қажет екенін, оған қолының қысқа екенін алға тартты. Биыл "Ақтөбегордорстрой" ЖШС қаладағы  15 көшені жөндейді. Сондықтан өндіріс орны өз керегін өзі өндіріп отыр. Жолға төселетін қоспаларды өзге өндірушілерден сатып алуға қаражат тапшы дейді серіктестік басшысы. Ал, әзірге  мына екі гектарға созылып жатқан зауыт бос тұр, битум ыдыстарынан білінер білінбес бу шығып жатыр. Тұрғындар бүгін де аспанға әдеттегідей қою түтін көтерілгенін айтып тағы да шағынды біздің редакциямызға. Тұрғындардың таза ауамен тыныстауы үшін қыруар қаражатқа салынған саябақты көк түтін басып салатыны да жолшыны айтарлықтай алаңдатып отырған жоқ. Бастысы ұтып алған тендерден айырылып қалмау. Естеріңізге сала кетсек  зауыттан шыққан ащы түтін қолқаны қауып, тынысымызды тарылтты деп редакциямызға хабарласқан тұрғындар бұл іске құзырлы орындардың араласуын сұрады. Мамандар зауыт орналасқан ауданнан сынамалар алып, зертханаға жіберген. Бірақ, нормадан ауытқу байқалмаған. Әйтсе де қаланың бас жоспарына сәйкес бұл нысан өзге аумаққа көшуі тиіс. Бірақ, оның қашан жүзеге асатыны белгісіз.