Қала әкімі Бекбол Сағын бүгін қорытынды есеп беру кездесуін өткізді. Табалдырығын тоздыратын қаладағы мемлекеттік мекемелердің басшылары бүгін халыққа өздері келді. Олардың алдына барып, мәселе айту үшін жазылудың, сағат санап кезек күтудің қажеті жоқ. Бәрі Тахауи Ахтанов атындағы драма театрдың дәлізіне қаз-қатар тізіліп отырды. Көбі жер сұрады, бірі жұмысқа орналасу жайын білді. Қала басшысы алда атқарылатын істерді нақтылады. Бірақ, жұмыс мардымсыз. Мәселен биыл тек 4 инвестициялық жоба ғана жүзеге асырылады. Ал азық-түлік бағасы мүлде ырыққа көнбей кеткен. Нанның бағасы 105 теңгеге жетті. Қала әкімінің есебінде микрофон қолдарына тимегендері, драма театрдың екінші қабатына жайғасқандары балконнан арыздарын қағазға жазып лақтырды. Облыс әкімі Бердібек Сапарбаевтың қолына тигенше дамыл таппады.