Бүгін өңірімізге жұмыс сапарымен келген "Астана Экспо-2017" Ұлттық компаниясы АҚ төрағасы Ахметжан Есімов облыс әкімі Бердібек Сапарбаевпен бірге қаладағы Өнеркәсіп аймағын аралады. Облыс әкімі Бердібек Сапарбаев жаңадан тұрғызылатын өнеркәсіп нысандарының жоспарымен таныстырды. Қазір облыста шамамен 190 кәсіпорын құрылыс саласында қызмет етеді. 10 ай ішінде 32 млрд теңгеге өнім өндірілді. Пластмасса құбырлар, керамикалық плиталар, нысандардың қасбетін жөндейтін түрлі материалдар "Экспо-2017" Халықаралық көрмесіне ұсынылатын жаңа ғимараттардың құрылысына қолданылмақ. Қазір "Астана ЭКСПО 2017" Ұлттық компаниясы 10 өңірдің әкімдігімен жалпы құны 30 млрд теңгені құрайтын шарттарға отырды. Шартқа сәйкес, елордадағы ЭКСПО нысандарын салуға 221 отандық тауар өндіруші жұмылдырылды. Айта кетейік, ЭКСПО халықаралық мамандандырылған көрмесі Астанада 2017 жылдың 10 маусымынан 10қыркүйегіне дейін өтеді. Оған 100 ел, кем дегенде 10халықаралық ұйым, инновациялық технологиялар саласындағы 10 көшбасшы компания қатыспақ. Жалпы алғанда,көрмеге 2 миллионнан артық адам келеді деп күтілуде.