"Ақжар-2" ауылында спорт мектебінің құрылысы басталды
"Ақжар-2" ауылында грек-рим күресінің жанашырлары асарлатып спорт мектебінің құрылысын бастады. 2016-шы жылға дейін салынып бітсе ол ауылдағы бірінші спорт нысаны болғалы тұр. Ақжардың балалары онда бокс, қазақша күреспен де айналысатын болады. Игі істі қолға алғандар үмеге үлес қосам деушілердің қолын қақпайды. "Ақжар-2" ауылында спорт мектебінің құрылысы осыдан 3 күн бұрын басталды. Бақытқали Батырғарин туыс, жолдас, таныстары және оқушыларымен бірігіп нысанның іргетасын құйып жатыр. Игі іске үлес қосуға ниет еткен адамдар қал-қарекеті жеткенше құрылыс материалдарын жеткізуде. Бақытқали Батырғарин бір уыс шеге әкеліп тастаған адамға да шексіз риза. Бақытқали Батырғарин 2013-ші жылы "Ақжар-2" ауылынан спорт мектебін тұрғызу жөніндегі идеясын инвестициялық комиссияға жолдайды. Қалалық әкімдік бұл идеяны құп көріп, ауылдан құрылысқа жер бөлген. Ені 16, ұзындығы 33 шаршы метр болатын нысанның 4 қабырғасын тұрғызып, шатырын жабу үшін кемінде 30 мың АҚШ доллары көлемінде қаражат қажет. Бақытқали Батырғарин 2016-шы жылы спорт мектебіне бала қабылдауды жоспарлап отыр. Мектепке Бақытқали Батырғариннің ағасы Есенкелді Батырғариннің есімі беріледі. Есенкелді Батырғарин Шалқар қаласынан шыққан балуан. Кеңес одағы халықтары спартакиадасының чемпионы 24 жасында дүниеден озды. Мектепті тұрғызуға Есенкелді Батырғариннің көзін көрген достары да атсалысып жатыр. Бақытқали Батырғарин бүгінде грек-рим күресінен "Ақжар-2" ауылында 40 шақты баланы жаттықтырып жүр. 2 жылдан бері жаттығулар №45-ші мектептің спорт залында өтеді. Енді биылдан бастап №49-шы мектепке қолқа салмақ. Жақын маңда балаларға басқа жаттығатын жер жоқ. Ал спорт мектебінің құрылысын аяқтау үшін демеушілердің көмегі қажет. Ол үшін банктен арнайы есепшот ашылған.
Количество показов: 1899
Дата создания: 29.05.2015 19:56:57
