Бүгін облыстық драма театр ғимаратында  білім беру қызметкерлерінің   тамыз кеңесі өтті. Тамыз кеңесі жағымды жаңалықпен басталды. Қалалық білім бөлімінің басшысы Ләззат Оразбаева биылғы түлектердің жетістігін ауыз толтыра айтты. Биылғы түлектер көрсеткен орташа балл - 88,6. Осылайша Ақтөбе республика бойынша алдыңғы ІІ орынға көтерілген. Түлектердің жетістігіне қуанғанымызбен қалада жалпы білім беретін мектептердің  санын арттыру мәселесі әлі де өзектілігін жойған жоқ. Бұл туралы тамыз кеңесіне қатысқан қала әкімі Ерхан Омаров айтты. Шаһар басшысының мәліметі бойынша Ақтөбеде үш ауысымда оқытатын мектептер әлі де бар. Мысалы былтыр алты мектепте балалар үш ауысымда білім алған. Балабақшаның жайы да әлі күн тәртібінен түскен жоқ. 3-6 жастағы балаларды  мектепке дейінгі ұйымдармен қамту  75,5 пайызды құрап отыр. Қаламызда 46 мемлекеттік, 20 жеке балабақша және 21 шағын орталық  бар. Әйтсе де балабақша кезегіндегі бүлдіршіндер саны әлі де болса азаймай отыр. Осы мәселені шешу үшін жыл соңына дейін "Авиатор"  ауданынан 320 орындық балабақша ашу көзделуде. 2015 жылы  1370 бала балабақшамен қамтылмақ. Соңғы жылдары мектепке дейінгі жеке ұйымдар саны өскен. 2001 жылы олардың саны тек 7-еу ғана болса, бүгінгі күні 20-ға жетті. Қала ұстаздарының төрт көзі түгел қатысқан бүгінгі кеңесте білім бөлімінің басшысы күрмеуі қиын тағы бір жайтты жасырып қала алмады. Ақтөбелік  87 оқушы өзге діни ағымның  шырмауына түскен. Қазір олармен және ата-аналарымен жұмыс жасалуда. Мәселенің алдын алу үшін қала мектептерінде лаңкестік пен экстермизмнің алдын алу үшін дөңгелек үстел, әңгімелесу, психологиялық тренингтер өткізіледі. Ләззат Оразбаева ұстаздарға балаларды өмірлік маңызы бар құндылықтарға бағыттап, қоғамдық өмірге араластыру қажеттігін нығырлап айтты. Оларды өтірік есеп беруден аулақ болуға шақырды. Бүгін қала басшысы үздіктерді марапаттауды ұмытпады. №41 орта мектеп, "Нұрсәт" балабақшасы және қалалық жас туристер стансасы озықтар көшін бастады. Ал білікті 10 ұстаз 100 мың теңгелік  сыйақыға ие болды. Айта кетейік биыл білім беру саласына  республикалық, облыстық, қалалық бюджеттерден   12 млрд. теңгеден астам қаражат бөлінген.