Облыстық өнер мұражайында тропикалық құстардың көшпелі көрмесі ашылды. Көрмеге құстардан бөлек, мешін де әкелінген. Көк-сары, жасыл қанатты Араны, Александрий, сұр, мәртебелі тотықұстарын, мысырлық күлегеш орман кептерін, Фишер мен бетперде ажырамасын, қызғылт какаду мен қызыл лориді, тукан токоны, ала амадина мен корелланы, тіпті аққол гибонды сонау тропикалық елдерге бармай-ақ, енді Ақтөбеден де  көруге болады. Қарағандының көшпелі құстар көрмесі қаламызға сенбі күні келді.  1-наурызға дейін аялдамақ. Тропикалық құстардың 22 түрі мен жалғыз мешін Ресейдің тәлімбақтарынан алынған. Қолға үйретілген, тіпті ұнаған түрлерін алдырту үшін тапсырыс беруге де болады. Құстардың бағасы 2 мыңнан басталып 4 мың долларға дейін барады. Ал мешін 10 мың доллардан бастап саудаланады. Мысалы, Боня есімді мына ұрғашы гиббон 2 жаста. Бір орында тұрмай, секіргенді жақсы көреді және адам қолындағы заттарды ойланбастан жұлып әкетеді. Жейтін тамағы-күріштен, қарақұмықтан жасалатын ботқалар, жаңғақтар, жеміс-жидектер, бастысы банан. Қыстың суығында экватор жылуын әкелген көрме 1 жарым жыл бұрын жасақталған. Бізге дейін Қарағанды, Қостанай, Көкшетау, Қызылжар, Семей қалаларында болған. Ақтөбеден кейінгі кезек Ақтауда. Айта кетейік, көрмеге кіру бағасы 900 теңге. 16 жасқа дейінгі балалар мен зейнеткерлерге 700, ал 4-ке толмаған бүлдіршіндер тегін тамашалайды.