Бүгін Ақтөбенің  көлік жүргізушілерін даярлайтын ең үздік мектебі мен жол ережелерінен еш мүдірмейтін үздік курсант анықталды. Байқау  осы жексенбісінде аталып өтетін жол апатынан қаза тапқандарды еске алу күні қарсаңында өтті. Үздіктер жол-патрульдік полициясының тіркеу-емтихан тапсыру орталығында  емтихан тапсыру  арқылы іріктелді. Қаладағы болашақ ең үздік жүргізушінің есімі Сәулеш Ерасылова. Жасы 63-те. Байқау шарты бойынша курсант емтихан сұрақтарына жылдам, әрі дұрыс жауап беруі керек болатын. Сәулеш Ерасылова 40 сұрақтың жауабын 7 минут ішінде белгілеп шықты. Тек 2 сұрақтың жауабынан ғана жаңылысқан. Байқауға "Авто", "Автостарт" және "Тарлан-М" мектептері қатысты. "Үздік автомектеп" атағын "Авто" мектебі иеленсе, "Автостарт" мектебі көлік жүргізушілерін сапалы дайындайтын оқу орталығы ретінде бағаланды. Облыста жүргізуші дайындайтын 63 автомектеп бар. Үздік мектептер арасында байқау жыл сайын дәстүрлі түрде өтеді. Мақсат курстарда берілетін теориялық, тәжірибелік білім сапасының артуына септік ету, әрі курсанттарды жүргізуші куәлігін өз білімдерімен  алуға ынталандыру.