Елбасы жариялаған Ұлт жоспарының 96-қадамында мемлекеттік органдардың статистикалық мәліметі онлайн түрінде қолжетімді болсын делінген. Осыған байланысты еліміздің барлық өңірінде жергілікті бюджеттің ашықтығын зерттеу қолға алынған болатын. Бүгін Ақтөбеде республикалық "Бюджеттік талдау және экономикалық мониторинг орталығы" қоғамдық қоры 2015 жылы жүргізілген зерттеудің нәтижесін жариялады. Қоғамдық қор ұсынған мәліметке сай, бюджетті жариялау үдерісі бойынша Шығыс Қазақстан мен Солтүстік Қазақстан облыстары алдыңғы қатарда. Мұндай талдау екі жыл сайын жүргізіледі. Соңғы зерттеу нәтижесі бойынша біздің өңірде 39,02 пайыз. Облыс қазынасы қанша соманы құрайды және қайда жұмсалып жатыр? Мұны мемлекеттік органдар үнемі сайтта жариялап отыруы тиіс. Сондай-ақ, жергілікті билік БАҚ-мен тығыз байланыста болуы керек. Бұл-"Бюджеттік талдау және экономикалық мониторинг орталығының" ұсынысы. Зерттеу қорытындысы бойынша өңіріміздің бюджет жобасын жоспарлау және дайындау үдерісінің ашықтығы 18,69 пайыз, бюджетті бекіту үдерісінің ашықтығы 42,45, ал бюджеттің орындалуын жариялау 39,36 пайызға тең. Бұл тұрғындар арасында жүргізілген сауалнаманың қорытындысы. Сарапшылар жергілікті әкімдікке бюджетке қатысты барлық мәліметті кеңінен таратып отыруға ұсыныс жасамақ.