Бүгін Ақтөбе төрінде түрлі ұлттың аспаптарында Қазанғап күйлері күмбірледі. Күйші-композитор Қазанғап Тілепбергенұлының 160 жылдығына арналған халықаралық "Ақжелең" күйшілер байқауы басталды. Күмбірлеген күй халықты бір серпілтіп тастады. Байқаудың "Ақжелең" аталуы да тектен-тек емес. "Ақжелең" күйінің 62 түрін бір-біріне ұқсамайтындай  етіп, түрлендіре тартқан осы Қазанғап бабамыз болатын. Байқауға қатысуға 31 өнерпаз іріктелген. Олар 18 бен 30 жас аралығындағы күйшілер. Байқау шарты бойынша сайыскерлер Қазанғаптың 3 шығармасын орындауы тиіс. Ең бастысы орындалу шеберліктері ескеріледі. Сонымен қатар, қатысушыларға күйшінің "Көкіл" және "Құс қайтару" күйлерін өз елдерінің ұлттық аспаптарында орындау міндеттелген. Шет елден келген қонақтардың шарадан алған әсері бөлек. Башқұрт, орыс, түрік  демей  бірнеше ұлттың өнерлі балаларын бір жерге тоғыстырған Қазанғаптың тойы үш күнге жоспарлаған. Үш күн қатарынан домбырадан күй төгіледі. Өнерге шөліркегендер  Т.Ахтанов атындағы драма театрға тегін кіріп, сусындай алады. Сайыс жеңімпаздары қорытынды кеште анықталатын болады. Ұйымдастырушылар сайыстың жүлде қоры да қомақты дейді.