Бүгін Ақтөбе рельс-арқалық зауытында алғашқы өнім шығарылды. Өнім шығару барысын Ақтөбеге жұмыс сапарымен келген Инвестиция және даму министрі Әсет Исекешов пен "Қазақстан темір жолы" ұлттық компаниясының президенті Асқар Мәмин, облыс әкімі Бердібек Сапарбаев тамашалады. Сондай-ақ, шараға сенат депутаты Елеусін Сағындықов және мәжіліс депутаттары Глеб Щегельский мен Ізбақ Өмірзақ қатысты. ТМД елдерінің ішінде теңдесі жоқ өндіріс нысанының ел экономикасына тигізер үлесі мол. Заманға сай индустриализация картасы бойынша салынған жоба құны 82,7 млрд теңге. Екі жыл бұрын басталған зауыт құрылысына мыңға жуық адам жұмылдырылды. Облыс әкімі Бердібек Сапарбаевтың айтуынша, ірі зауыттың екінші кезеңі іске қосылса   қажетті шикізат өндіру ісі қолға алынады. Кәсіпорын жылына 200 мың тонна көлемінде теміржол рельсін, 230 мың тонна басқа да сұрыптық өнімдер шығарады деп жоспарланған. Зауытты іске қосу арқылы «Қазақстан темір жолы» ҰК» АҚ-ның рельсті өнімдерге деген сұранысын қамтамасыз ету, сондай-ақ таяу және алыс шетелдерге экспорттау көзделген. Қазір  Ресей, Өзбекстан, Түркменстаннан өзге Грузия, Қырғызстан, Әзірбайжан, Тәжікстан, Иран мемлекеттері нарығында рельске деген сұраныс жоғары. «Siemens S.P.A» компаниясының бас директоры Джузеппе Феррарионың айтуынша, Ақтөбедегі зауытқа әлемдегі ең озық, соңғы технология қолданылған. Алда өнім ішкі нарықты толық қамтып, артылғаны шет елге жөнелтіледі. Өнімді сатып алушылар дайын. Бүгін Әзербайжан, Белоруссия, Грузия, Өзбекстан, Тәжікстан және Қырғызстанның теміржол компанияларымен зауыт арасында меморандумға қол қойылды.